امتى نعيش؟؟؟؟؟؟

ما فيش معايا غير يادوب ورقه وقلم
واللى فى قلبى كلمتين
متغمسين حرقه والم
ع اللى بيجرى فى الغلابه
المطحونين المتعاصين ذل وشقا
والعدل فين ؟
وكام برئ عايش مابينا بيتظلم
وان قولت مره انا حقى فين؟؟؟
تلقى الجواب
خاين جبان
شكله عميل عايز يغير فى النظام
عايز يبيع سيدنا الولى

قومو احبسوه فى مكان بعيد
وعذبوه ودوسو خده بالقدم
وان حد يوم يسأل عليه
ابقوا اضربوا جد اللى جابه بالصرم
وماتخافوش من الرعاع الشقيانين لاجل العيال
رضيوا خلاص فقدوا الامل
اه يا زمن واهين عليك
امتى الحكايه هاتتعدل؟؟؟



وما فيش معايا غير يدوب ورقه وقلم
واللى فى قلبى كلمتين متغمسين حرقه والم
لاجل البلد
واللى بيجرى فى البلد
والمسؤلين باعوا القضيه بالدولار
قطفوا سنابل حلمنا
وهدوها واحده من الغجر
قبضوا التمن
سهروا معاها ليله حمرا
من ليالى الفرفشه
والنقطه كات من دمنا
دم الغلابه المتهانين علشان رغيف
اه يا بلد
صوتك عدم
صمتك مخيف
قومى اصرخى
شيلى الولى
لمى اللى باقى مننا
واوعاكى تانى تهتفى
عاش الولى مات الولى

وان كان خلاص زمن الامل فات وانقضى
يبقى السؤال
امتى نعيش؟؟
امتى يعود تانى النهار؟؟؟
والليل يفارق ارضنا يرحل بعيد؟؟
ومافيش جواب

رد القلم قال الجواب
الحل اصله فى السما
ان الكريم ابن الكريم ابن الكريم
يمسك خزاين ارضنا
ونوح يعود بالمركبه
ويشيل بقايا حلمنا
وموسى ييجى بالعصا
تاكل افاعى حيينا
وعيسى ينزل م السما
يحيي القلوب الميته
يمحى العما
وطه ييجى يلمنا يجمعنا تانى ع الشهاده يؤمنا
مادام بقينا مشتتين
ومبعترين من غير هدف
والخوف مابينا الف غول
عمال بياكل فى القلوب
ودود بينخر
والعقول متشمعه
اه يا زمن واهين عليك
امتى الفساد بقى يحتضر
امتى يعود ؟؟
زمن الطيابه والقيم


وما فيش معايا غير يدوب ورقه وقلم




من اعمالى